مؤتمر الشباب في شرم الشيخ .. عاملين اعلان بيدعوا فيه شباب العالم و بيقولوا لهم .:
"لو عندك مشكلة في التعبير عن رأيك أو لو أجبرت انك تسيب بلدك او لو بتعانى من التمييز فأنت مدعو لأنك تتكلم في مؤتمر شباب مصر.."
شوف الابداع والذكاوة في الاعلان ، تحس كأن دولة اسكندنافية مثلا بتفتح أحضانها للمضطهدين في العالم ، اللي مش عارفين يعبروا عن رأيهم او بيعانوا من التمييز ..
ماهو علاء عبد الفتاح واحمد ابو دومة وباقي شباب الثورة والالتراس اللي في السجون مش عارفين يعبروا عن رأيهم ..
ولما عبروا لبسوا قضايا تقعدهم عمرهم محبوسين ..
واقباط مصر بيشعروا بعمق شديد بالتمييز ، بالاضطهاد والظلم ومش عارفين يصلوا..وبيمضوا غصب واقتدار على محاضر صلح عرفي
وستات مصر بيشعروا بالبهدلة حضرتك في الشوارع والمواصلات ومكاتب العمل وفي المصانع ، كل ست مشروع متحرش بيها او مغتصبة او متهانة ولا تقدر تنطق ولو نطقت بتتفضح ..
وملايين الغلابة بيشعروا بالتمييز والجوع والبرد والحاجة ...والحزن على اوضاعهم ..
ماتعزم البشر دي على المنتدى ...
كل دول ..كل دول ... والمصحف الشريف ...نيد تو توك ..نيد تو كراي ...نيد تو شاوت
نيد تو يشتموا كل اللي بيستعبط ومش حاسس بمعاناتهم في الظروف السودا دي.
على حساب مين ؟
خلينا في المنتدى المخملي اللطيف ده اللي ريحة ولاد الناس فايحة منه ..
اول سؤال عن الناس اللي هتشارك من برة ...جايين تذاكر سفر واقامة وخلافه على حساب مين؟ يا إما على حساب مؤسساتهم مثلاً هي اللي هتحاسب وده مستبعد ..لأن ده مش بيحصل الا في استثناءات قليلة في النوع ده من الفعاليات ، او على حسابهم الشخصي وده برضه مستبعد .
او على حساب الشعب المصري وده الاقرب للصحة ..
نقدر نعرف كام واحد جايين وهيكلفوا البلد كام ؟ وبالمرة نعرف الفوايد اللي ممكن تعود علينا من الموضوع ده ؟
المؤتمر رافع شعار ( من أجل الابداع – التنمية – السلام ) ونوعية الشعارات المجانية المفتوحة دي اللي مالهاش مسكة بتستخدم في حالة الرغبة في عمل فرقعة والسلام ،او واجهة لحاجة تاني بتتعمل في الخفاء ..
وايه المصلحة بجد في محاكاة نموذج الأمم المتحدة يعني ؟ عايز تعلم مين ايه ؟
النوع ده من الأنشطة بيتعمل في اقتصاد وعلوم سياسية مثلاً لأن ده جزء من دراستهم وشغلهم وبياخدوا عليه درجات وتقييم من الاساتذة
طب انت عامل النموذج علشان تحقق ايه ؟
4 مؤتمرات في 7 شهور
الباشمهندس وزير الشباب والرياضة لما سألوه قال ان تنظيم مصر للمؤتمر الدولي للشباب "يأتي بعد نجاحها في عقد 4 مؤتمرات قومية للشباب في 7 شهور برعاية وبحضور الرئيس السيسي وهو ما حاز على إشادة ملوك ورؤساء مختلف دول العالم للمصداقية والشفافية التي اتسمت بها تلك المؤتمرات والتي أصبحت حالة غير مسبوقة في المنطقة ونافذة يقوم فيها رئيس الجمهورية بتفاعل مباشر ومبهر مع كل المواطنين من خلال الشباب".
ولاحظ هنا ان الوزير بيعتبر عقد 4 مؤتمرات في 7 شهور نجاح ، ومن عظمة اللي اتحقق زعماء العالم انتبهوا للانجاز العظيم ده فأشادوا وقالوا ان المؤتمرات حاجة غير مسبوقة في المنطقة...واستغربوا ومن فرط الازبهلال كانوا بيسألوا وهم بيضربوا كف على كف ..ازاي رئيس جمهورية يعمل كده ..؟ يتفاعل مع الشباب والجو ده .
كلام الوزير مبشر ومطمئن وبيقول اننا داخلين على مستوى غير مسبوق من الزروطة والاستعباط .
الرئيس لما وجه الدعوة للشباب من مختلف دول العالم للمشاركة في منتدى شباب العالم قال – حسب الموقع الرسمي للمنتدى – ان الغرض هو ان الشباب ينقل للعالم رسالة سلام وتنمية ومحبة من أرض مصر.
سيادة الرئيس ..
التنمية وفهمنا قصدك
ايه شكل ومضمون رسالة السلام والمحبة دي يعني ..؟ وسلام مع النفس ولا مع شباب البلد ولا مع الكيان الصهيوني و لا مع الأديان ولا قوى المعارضة ولا مين ؟
ومصر دلوقت عاملة سلام وحب مع مين؟ ومن أي اتجاه ؟